జనహితం న్యూస్ కరీంనగర్ : కరీంనగర్ జిల్లాలో కాంగ్రెస్ పార్టీకి కీలక నేతగా ఉన్న తాటికొండ జీవన్ రెడ్డి సంచలన నిర్ణయం తీసుకున్నారు. దశాబ్దాలుగా పార్టీకి వెన్నుముకలా ఉన్న ఆయన, తాజా రాజకీయ పరిణామాలపై అసంతృప్తితో కాంగ్రెస్ పార్టీకి రాజీనామా చేయాలని నిర్ణయించుకున్నారు.

ఈ మేరకు వచ్చే 25న తన పదవితో పాటు పార్టీ ప్రాథమిక సభ్యత్వానికి కూడా రాజీనామా చేస్తున్నట్లు ఆయన తన అనుచరులకు తెలియజేశారు. పార్టీ తనకు ఇచ్చిన అవకాశాలను గుర్తు చేసుకున్నప్పటికీ, ప్రస్తుతం పరిస్థితులు తనకు అనుకూలంగా లేవని భావించినట్లు సమాచారం.

ఈ పరిణామాల నేపథ్యంలో రాష్ట్ర మంత్రులు దుద్దిళ్ల శ్రీధర్ బాబు మరియు అడ్డూరి లక్ష్మణ్ కుమార్ జీవన్ రెడ్డి నివాసానికి వెళ్లి ఆయనతో చర్చలు జరిపారు. పార్టీని వీడవద్దని, సమస్యలను హైకమాండ్ దృష్టికి తీసుకెళ్లి పరిష్కరిస్తామని హామీ ఇచ్చారు.

అయితే ఈ చర్చలు ఫలించలేదు. జీవన్ రెడ్డి తన నిర్ణయంపై వెనక్కి తగ్గకుండా రాజీనామాకు కట్టుబడి ఉన్నట్లు తెలుస్తోంది. ఈ పరిణామం కరీంనగర్ జిల్లా రాజకీయాల్లోనే కాకుండా రాష్ట్ర కాంగ్రెస్ పార్టీలో కూడా కలకలం రేపుతోంది.