జనహితం న్యూస్: పీపీఎఫ్, నేషనల్ సేవింగ్స్ సర్టిఫికెట్ (ఎన్‌ఎస్‌సీ) సహా వివిధ చిన్న మొత్తాల పొదుపు పథకాలపై వడ్డీ రేట్లు వరుసగా నాలుగో త్రైమాసికంలోనూ మార్పులేకుండా కొనసాగుతున్నట్లు కేంద్ర ప్రభుత్వం ప్రకటించింది.

2025 జనవరి 1 నుంచి ప్రారంభమైన 2024-25 ఆర్థిక సంవత్సరంలోని నాలుగో త్రైమాసికం మార్చి 31 వరకు కొనసాగుతుంది. ఈ కాలానికి సంబంధించి అక్టోబర్-డిసెంబర్ త్రైమాసికంలో అమల్లో ఉన్న వడ్డీ రేట్లనే కొనసాగిస్తున్నట్లు కేంద్ర ఆర్థిక శాఖ మంగళవారం నోటిఫికేషన్ విడుదల చేసింది.

ఈ నోటిఫికేషన్ ప్రకారం సుకన్య సమృద్ధి యోజన (ఎస్ఎస్‌వై) పథకంపై 8.2 శాతం వడ్డీ కొనసాగుతుంది. మూడు సంవత్సరాల టర్మ్ డిపాజిట్‌పై 7.1 శాతం వడ్డీ రేటు అమలులో ఉంటుంది.

అలాగే పాపులర్ పబ్లిక్ ప్రావిడెంట్ ఫండ్ (పీపీఎఫ్)పై 7.1 శాతం వడ్డీ కొనసాగుతుండగా, పోస్టాఫీసుల చిన్న మొత్తాల పొదుపు పథకాలపై కనిష్ఠంగా 4 శాతం వడ్డీ అమలులో ఉంది.

కిసాన్ వికాస్ పత్రాలపై 7.5 శాతం వడ్డీ ఉండగా, 115 నెలల్లో మెచ్యూరిటీ పూర్తవుతుంది. నేషనల్ సేవింగ్స్ సర్టిఫికెట్ (ఎన్‌ఎస్‌సీ)లో పెట్టుబడులపై 7.7 శాతం వడ్డీ లభిస్తుంది. నెలవారీ ఆదాయ పథకం (మంత్లీ ఇన్‌కమ్ స్కీమ్)పై 7.4 శాతం వడ్డీ అందించబడుతుంది.

ఇలా ప్రస్తుత ఆర్థిక సంవత్సరంలో నాలుగు త్రైమాసికాలుగా చిన్న పొదుపు పథకాలపై వడ్డీ రేట్లు మార్పులేకుండా కొనసాగుతుండటం గమనార్హం.