జనహితం న్యూస్, క్రైమ్‌ విభాగం: ఫోన్ ఎక్కువగా చూడొద్దని తల్లిదండ్రులు మందలించడంతో మనస్తాపానికి గురైన ఓ విద్యార్థిని ఆత్మహత్యాయత్నానికి దిగిన ఘటన జిల్లాలో కలకలం రేపింది. చివరకు అధికారుల చాకచక్యంతో పెద్ద ప్రమాదం తప్పింది.

ఈ ఘటన Kamareddy జిల్లాలోని బూర్గుల్ గ్రామంలో చోటుచేసుకుంది. స్రవంతి అనే విద్యార్థిని ఇటీవల ఇంటర్ మొదటి సంవత్సరం పరీక్షలు రాసి ఇంట్లోనే ఉంది. ఫోన్ ఎక్కువగా వాడుతున్నందుకు బుధవారం రాత్రి తల్లిదండ్రులు మందలించారు.

దీంతో మనస్తాపానికి గురైన ఆమె గురువారం ఉదయం ఇంటి దగ్గర ఉన్న నీటి ట్యాంకు మెట్లపైకి ఎక్కి, దూకేస్తానంటూ బెదిరించింది. మొదట తల్లిదండ్రులు, గ్రామ సర్పంచ్ కలిసి ఎంత నచ్చజెప్పినా వినలేదు.

వెంటనే పోలీసులకు సమాచారం ఇవ్వడంతో వారు అక్కడికి చేరుకున్నారు. అయితే పోలీసులను చూసిన తర్వాత పరిస్థితి మరింత టెన్షన్‌గా మారింది. భయపడిన విద్యార్థిని పూర్తిగా ట్యాంకుపైకి ఎక్కి, దూకుతానని చెప్పడంతో అక్కడ ఉన్నవాళ్లందరూ ఆందోళనకు గురయ్యారు.

సమాచారం అందుకున్న వెంటనే బాన్సువాడ సబ్‌కలెక్టర్ Kiranmayi ఘటనాస్థలానికి చేరుకున్నారు. ఎవరికీ తెలియకుండా నెమ్మదిగా ట్యాంకు మెట్లు ఎక్కుతూ పైకి వెళ్లి, విద్యార్థినితో మాట్లాడారు.

“ఏమీ కాదు.. నువ్వు కిందికి రా.. ఇంట్లో ఎవ్వరూ నిన్ను మందలించరు” అంటూ ఆమెకు ధైర్యం చెప్పారు. కొంతసేపు మాట్లాడి నమ్మకం కల్పించడంతో, చివరకు విద్యార్థిని కిందికి దిగింది.

దాదాపు తొమ్మిదిన్నర గంటల పాటు కొనసాగిన ఈ ఉద్రిక్త పరిస్థితికి దీంతో తెరపడింది. అక్కడ ఉన్నవాళ్లు ఊపిరి పీల్చుకున్నారు.