జనహితం న్యూస్, టీ నర్సాపురం: మహాత్మా జ్యోతిరావు ఫూలే జయంతి సందర్భంగా టీ. నర్సాపురం మండలంలో వేడుకలు సాదాసీదాగా కాకుండా భావోద్వేగంగా నిర్వహించబడ్డాయి. సమాజంలో కుల వివక్ష, అంటరానితనంపై పోరాటం చేసి బడుగు, బలహీన వర్గాల అభ్యున్నతికి జీవితాన్ని అంకితం చేసిన మహానీయుడిగా ఫూలేను గుర్తు చేసుకున్నారు.

మండలంలోని గండిగూడెం గ్రామంలో గ్రామ పెద్ద కొరివి శేషరావు పిలుపుతో స్థానిక ఎంపీపీ పాఠశాలలో ఈ కార్యక్రమం జరిగింది. జనసేన పార్టీ మండల అధ్యక్షులు అడపా నాగరాజు, గ్రామ అధ్యక్షులు పాలేటి సత్తిబాబు ముఖ్య అతిథులుగా హాజరై ఫూలే చిత్రపటానికి పూలమాలలు వేసి నివాళులు అర్పించారు.

ఈ సందర్భంగా నాయకులు మాట్లాడుతూ, ఫూలే చూపిన మార్గం ఈ రోజుల్లో కూడా ఎంతో ప్రాసంగికమని తెలిపారు. అణగారిన వర్గాల హక్కుల కోసం, మహిళలకు విద్యా అవకాశాల కోసం ఆయన చేసిన కృషి ప్రతి ఒక్కరికీ ప్రేరణగా నిలుస్తుందని అన్నారు.

కార్యక్రమంలో కొరివి శ్రీకాంత్, పిన్నిబోయిన వెంకటేశ్వరావు, పబ్బు జయరాజు, కన్నం సర్వేశ్వరావు, భూక్యా వేణు, కొరివి నాగేశ్వరావు, నాషార్ పాషా, పింగుల మధు, మంగరాజు, సాయిలా కాశీ, బైగాని చందు తదితరులు, పాఠశాల యాజమాన్యం మరియు గ్రామ ప్రజలు పాల్గొన్నారు.

కార్యక్రమం అనంతరం చిన్నారులకు బిస్కెట్లు, స్వీట్లు పంపిణీ చేయడం జరిగింది.